阿公講古（短劇） 王伶俐

時間：某一工的下晡

地點：客廳

佈景：大門佇客廳的正手爿，倒手爿有一組L形的膨椅，一細塊桌仔，對面有一櫥低酒櫥，面頂囥一台電視。

人物：阿明：13歲，讀國一；阿明的阿公：68歲。

－－－ 幕沓沓仔扭起來 －－－

阿公坐佇客廳看電視。阿明逶學校轉來，一個面懊嘟嘟，行去坐佇阿公的身軀邊，冊包囥佇邊仔。

阿公：乖孫也！汝佇學校是發生啥物代誌？哪會一個面懊嘟嘟？汝嘛講來予阿公聽看覓咧！（關心的表情）

阿明：煞毋知影阮老師今仔日派一個功課，叫阮轉來愛去揣咱台灣近代的歷史，擱講後禮拜愛上台報告。我那會曉？阿

公，汝共我湊相共，好毋好啦？（卜哭卜哭的表情）

阿公：唉喲！我叫是發生啥物代誌啊！台灣的歷史赫爾長，是卜逶陀講起？無安爾，汝想卜了解陀一項，汝問，我講，

安爾好無？

阿明：好啊！（歡喜的表情，講煞停一下）

阿公，荷蘭人是當時來台灣的？擱是安怎予鄭成功趕走的？

阿公：西元一六二二年，荷蘭人佔領澎湖，予明朝的沈有容將軍帶兵共趕走。經過差不多兩冬的時間，怹擱用東印度公

司的名義佔領台灣府城，.......（作咧想代誌的表情）

阿明：阿公，台灣府城是佇陀位？

阿公：就是即碼的台南市。我話猶未講完！汝毋都恬恬聽阿公講。（手挲阿明的頭）

阿明：好啦！好啦！我恬恬聽，阿公汝緊講！（歹勢的表情）

阿公：西元一六二四年荷蘭人佔領台灣府城了後，擱建立熱蘭遮城，怹佔領台灣攏總有三十八年的時間。

阿明：阿公，怹佔領咱台灣是卜創啥？（懷疑的表情）

阿公：戇孫咧！咱台灣是一個寶島，迄時陣西洋人共號作『FORMOSA』，遮有足濟物資，像鹿皮、甘蔗.......，荷蘭人著提遮的物件佮日本、東南亞的國家做貿易，趁袂少錢呢！

阿明：阿公，汝猶未講鄭成功的故事，緊講啦！（扭阿公的手，撒奶聲）

阿公：囡仔人哪會赫爾急性！毋都予我慢慢仔講。（面仔笑笑）

阿明：阿公，汝擱毋緊講，天都卜光啊！（手指外口）

阿公：好！好！我講、我講。（喙也笑笑，停一下）

西元一六六一年，鄭成功逶福建廈門統領二萬外名官兵來到台江內海，對鹿耳門登陸，隔冬，向南攻破熱蘭遮城，趕走荷蘭人，台灣著正式進入明鄭的開發時代。

阿明：阿公，鄭成功統治咱台灣有偌久？

阿公：怹祖孫仔三代統治台灣二十一冬。

阿明：阿公，鄭成功的囝是毋是叫做「鄭克塽」？伊的孫是毋是叫做「鄭經」？

阿公：唉喲！想袂到我即個乖孫的遮爾巧。毋過，汝共怹兩個的名講倒反！（笑出聲）

阿明：喔！原來「鄭經」是怹囝；「鄭克塽」是怹孫！（目睭展甲大大蕊）

阿公，阮老師今仔日擱有講一句俗語，是.......，啊！我想著啊：「紅痣」若出頭，「羅漢」著目屎流！

阿公：乖孫咧！是「紅柿」若出頭，「羅漢跤仔」著目屎流！

阿明：阿公，即句話是啥物意思？

阿公：阿明，汝猶細漢，犯勢無法度體會即句俗語的心酸。一六八三年，清朝派施琅攻下台灣，為著驚漢人來台灣會繼續「反清復明」的活動，康熙皇帝頒布「移民三禁」，禁止家眷來台，所以大多數的移民攏是「獨身仔」，較好運的參當地平埔族的查囡仔結婚，所以有一句俗語講「有唐山公，無唐山媽」；若是揣無對象的，無某、無厝，尾仔變成遊民，屈佇廟裡羅漢像的下跤，所以予人叫做「羅漢跤仔」。紅柿若出頭著表示秋天到，天氣變涼，日子著歹過囉！」（表情嚴肅，聲音愈來愈沉重）

阿明：阿公擱講一寡其他的歷史予我聽好無？（期待的表情）

阿公：乖孫咧！時間無早，阿公也悿啊！汝功課攏猶未寫，緊去寫寫咧，另日阿公卡擱講日本時代的歷史予汝聽。（安慰的口氣）

––––– 幕放下 –––––